O Barco centro urbano e as súas 14 parroquias ocupan parte do val do río Sil e as terras de montaña que o rodean. Esta configuración do terreo é o que deu orixe ao topónimo, a partir dunha base prelatina, *barc u *barg (concavidade).  Como capital da comarca convertese en  centro comercial e de servizos administrativos e de hostalería. O mellor xeito de chegar é a través da N-120 en coche e tamén por tren con estación no centro. 

O casco urbano ten o paseo do Malecón como punto de referencia para veciños e visitantes para vivir o río Sil. A través de pasarelas como a da Capitana comunican o casco vello, coas súas singulares casas sobre o río, coa vila de Viloira e a súa casa grande (nome que se lle dá os pazos en Valdeorras). Un gran edificio do século XVII que hoxe é sede de oficinas da administración galega. Ademais os seus xardíns son de uso e goce de todos os paseantes. A feira mensual en Viloira, cada día 6, é punto de encontro non só dos veciños desta localidade senón tamén da contorna.