A RÚA DE VALDEORRAS
Unha vila ligada ao pasado romano
SITUACIÓN XEOGRÁFICA
A vila ruesa está ligada á historia dos antigos poboadores do val, os gigurros, e tamén ao pasado romano da zona coa Via Nova como protagonista. Entre os lugares visitables relacionados con ese pasado destaca a lápida de Pompeio Reburro, o primeiro valdeorrés de nome coñecido ou a ponte da Cigarrosa, con base romana aínda que a súa fábrica actual xa é medieval.
Ademais do apartado histórico, un dos lugares que máis identifica este concello é o encoro de San Martiño e toda a paraxe que se creou ao seu redor: a área recreativa do Aguillón. Na contorna deste encoro reúnese a oferta deportiva, recreativa e lúdica da vila, converténdoo nun dos maiores recursos turísticos do municipio.
HISTORIA
A orixe etimolóxica do topónimo A Rúa podería ter a súa orixe na Via Nova romana. A calzada atravesaba o val e a súa superficie de gravas e sábrego xustificaría o nome de «via ruga» (unha vía «rugosa»); ese adxectivo evolucionaría ao substantivo rúa.
O concello rués conta entre as súas localidades ca antiga poboación de San Estevo, da que se indica nalgúns escritos que sería o xermolo deste municipio. De feito, nos documentos medievais fálase de San Estevo e só a finais da Idade Moderna empeza a aparecer San Estevo da Rúa. Polo que hai historiadores como Quintana Prieto e Castro Voces que manifestan dúbidas sobre a orixe latina do topónimo, pola distancia temporal entre a palabra e o seu primeiro uso.
O municipio conta con outros lugares con historia como é o caso de Fontei cunha igrexa disque deseñada polo arquitecto Gaudí e mesmo unha casa grande, hoxe reconvertida en parte en adega.
A vila hoxe vive principalmente do comercio e do viño, tendo un número importante de adegas da DO Valdeorras e mesmo unha cooperativa dos anos 50 do século pasado.
Tamén ten un espazo senlleiro a empresa Iberdrola, xa que aquí ten a sé que xestiona varios encoros da contorna. De feito, un dos espazos paisaxísticos máis destacado deste municipio é o Encoro de San Martiño e toda a área recreativa do Aguillón, conformada pola presenza do río Sil e este encoro. Un lugar no que se atopan pistas deportivas, campos de fútbol, a piscina e polideportivo municipal.
Ademais co paso dos anos, creouse todo un novo espazo de alto valor ecolóxico, converténdose nun lugar para aniñar diversas especies e tamén de paso migratorio de multitude de paxaros.
Un dos lugares ideais deste concello para admirar este encoro, o río Sil e a paisaxe de viñedos e montañas que o rodea é o miradoiro de Barranco Rubio.
Dende este punto tamén se pode ver a Igrexa de Santo Estevo, de orixe barroca, e a de Fátima de Fontei, xa do século XX. Así como a ponte da Cigarrosa, de orixe romana e punto importante da Via Nova, que une os concellos da Rúa e o de Petín.
LUGARES DE INTERESE
ENCORO DE SAN MARTIÑO
IGREXA DE SANTO ESTEVO
PONTE DA CIGARROSA
MIRADOIRO DE BARRANCO RUBIO
IGREXA DE FÁTIMA
LUGAR DAS PINGUELAS
LÁPIDA DE POMPEIO REBURRO
IGREXA DE FÁTIMA
ENCORO DE SAN MARTIÑO
IGREXADE SANTO ESTEVO
LÁPIDA DE POMPEIO REBURRO
PONTE DA CIGARROSA
